చద్దన్నం లేదా పులియబెట్టిన అన్నం ఒకప్పుడు రైతులు, కూలీలు బలం కోసం తినే అల్పాహారం. ఇప్పుడు fermented rice ప్రొబయోటిక్ ఫుడ్‌గా మళ్లీ ప్రాచుర్యంలోకి వచ్చింది. దీని ఆరోగ్య ప్రయోజనాలు, వంట విధానం, ప్రాంతాలవారీ పేర్లు తెలుసుకోండి.
ఒకప్పుడు మన ఊళ్లలో ప్రతి ఇంట్లోనూ కనిపించే అల్పాహారం — చద్దన్నం. కుక్కర్లు రాని కాలంలో, అన్నం వండి గంజి వార్చి, దబ్బ లేదా నిమ్మాకు వేసి ఒకటి నుంచి మూడురోజులు పులియబెట్టేవారు. ఉదయం ఆ అన్నంలో మజ్జిగ లేదా పెరుగు కలిపి, ఉల్లిపాయ లేదా మిరపకాయతో తినేవారు. ఈ సంప్రదాయ వంటకాన్ని “తర్వాణి” అని కూడా పిలిచేవారు.
దేశవ్యాప్తంగా వాడుకలో ఉన్న చద్దన్నం
- అస్సాం: పొయిటాబాత్
- బీహార్: జీల్‌బాత్
- తమిళనాడు: పళయ సాదమ్
- బెంగాల్, ఒడిశా: పఖాలా బాత్ (ఒడిశాలో మార్చిలో చద్దన్నం దినోత్సవం జరుపుతారు)
బెంగాల్‌లో కొత్త సంవత్సరం రోజున చద్దన్నం తినడం సంప్రదాయం. ఆవనూనె, జీలకర్ర, పుదీనా, చేప వంటలతో వడ్డిస్తారు. ఈశాన్య భారతదేశంలో దీన్ని తింటే పులి బలం వస్తుందని నమ్మకం.
చద్దన్నం యొక్క ఆరోగ్య ప్రయోజనాలు
- ప్రొబయోటిక్ ఫుడ్: పులియబెట్టినప్పుడు సహజమైన మంచి బ్యాక్టీరియా పెరిగి జీర్ణక్రియ మెరుగుపడుతుంది.
- మినరల్స్ అధికం: సాధారణ అన్నంతో పోలిస్తే ఐరన్ 21% ఎక్కువ. కాల్షియం, మెగ్నీషియం, పొటాషియం కూడా అధికంగా లభిస్తాయి.
- విటమిన్లు: బి6, బి12 విటమిన్లు సమృద్ధిగా ఉండి అలసటను తగ్గిస్తాయి, కండరాల నొప్పులను తగ్గిస్తాయి.
- రోగనిరోధక శక్తి: ఇమ్యూనిటీ పెంచి రక్తహీనత నివారిస్తుంది.
- చర్మ ఆరోగ్యం: గంజిలోని విటమిన్ E, ఫెరూలిక్ ఆమ్లం, కొలాజెన్ వల్ల చర్మం మృదువుగా ఉంటుంది, అలర్జీలు తగ్గుతాయి.
- వేసవిలో రక్షణ: వడదెబ్బ తగలకుండా ఉంచుతుంది.
ఆధునిక కాలంలో మళ్లీ ప్రాచుర్యం
పాశ్చాత్య దేశాల్లో కూడా ఇప్పుడు చద్దన్నం ప్రొబయోటిక్ రైస్‌గా గుర్తింపు పొందింది. స్టార్ హోటళ్ల మెనూలో fermented rice పెరుగు, కొబ్బరి తురుము, కరివేపాకు, ఆవకాయ, దబ్బకాయబద్ద వంటి వడ్డనలతో చేరింది.
