నందిగామ మండలంలోని కూడలి సంగమేశ్వర స్వామి ఆలయం ఒక అపూర్వమైన ఆధ్యాత్మిక క్షేత్రంగా ప్రసిద్ధి kudali చెందింది. ఈ ఆలయంలోని విగ్రహాలను ఎవరు ప్రతిష్టించారనే విషయం ఇప్పటికీ ఎవరికీ తెలియదు. ఇక్కడ శివుడు, కేశవుడు ఒకే ప్రదేశంలో కొలువై ఉండటం ఈ ఆలయానికి ప్రధాన విశిష్టత.
సంగమేశ్వర స్వామి స్వయంభూగా వెలసి భక్తుల కోర్కెలు తీర్చుతున్నారని భక్తుల విశ్వాసం. అలాగే చెన్నకేశవ స్వామి కూడా స్వయంభూగా వెలిశారని స్థలపురాణాలు చెబుతున్నాయి. సుమారు 800 సంవత్సరాల నుంచి ఈ ఆలయం నిత్య పూజలు అందుకుంటూ వస్తోంది.
శివ–కేశవుల సంయుక్త దర్శనం
సాక్షాత్తూ శివుడు మరియు కేశవుడు ఒకే ఆలయంలో కొలువై ఉండి భక్తులకు దర్శనమివ్వడం చాలా అరుదైన విషయం. సింధూ నాగరికత కాలం నుంచే మహాశివుడు పశుపతిగా, లింగ రూపంలో పూజలందుకుంటున్నాడు. ఈ ఆలయంలో పార్వతీ దేవి విగ్రహంతో పాటు నాయికుడి విగ్రహం కూడా ఉంది.
నదుల సంగమంలో పవిత్ర క్షేత్రం
ఈ ఆలయం ఎదుట కట్లేరు ఏరు, వైరా ఏరు కలుస్తాయి. రెండు నదులు కలిసే ఈ ప్రదేశాన్ని పూర్వకాలం నుంచే ‘సంగమం’ లేదా ‘కూడలి’గా పిలుస్తున్నారు. ఈ సంగమంలో స్నానం చేస్తే పాపాలు పోతాయని, సుఖసంతోషాలు కలుగుతాయని భక్తుల నమ్మకం.
ఇక్కడ మరో ప్రత్యేక విశ్వాసం ఏమిటంటే – రాత్రి ఆలయ ప్రాంగణంలో నిద్ర చేసి, తెల్లవారిన తరువాత నది స్నానం ఆచరించి స్వామివారిని దర్శించుకుంటే కోరిన కోర్కెలు తప్పక నెరవేరుతాయని భక్తులు చెబుతున్నారు.
మహాశివరాత్రి మహోత్సవం
మహాశివరాత్రి పర్వదినాన్ని ఈ ఆలయంలో మూడు రోజుల పాటు అత్యంత వైభవంగా నిర్వహిస్తారు. ముఖ్యంగా శివరాత్రి నాడు భక్తులు తండోపతండాలుగా తరలివస్తారు. అర్థరాత్రి లింగోద్భవ కాలంలో స్వామివారి కళ్యాణ మహోత్సవం ఘనంగా జరుగుతుంది.
ఆలయ పునరుద్ధరణ చరిత్ర
గతంలో అన్యమతస్తుల దాడుల్లో ధ్వంసమైన ఈ ఆలయం, రాజా వాసిరెడ్డి వెంటాద్రినాయుడు కాలంలో మళ్లీ పూర్వ వైభవాన్ని సంతరించుకుంది. ఒకసారి ఈ ఆలయం గుండా వెళ్తున్న సమయంలో స్థానికులు ఆలయ ప్రాముఖ్యతను రాజుకు వివరించడంతో, అప్పటి నుంచి నిత్య పూజలు ప్రారంభమై ఆలయం తిరిగి కళకళలాడింది.
ఝాన్సీ లక్ష్మీబాయి దర్శించిన క్షేత్రం
ఝాన్సీ రాజు గంగాధర నెవల్కార్ పరమ శివ భక్తుడని, ఝాన్సీ లక్ష్మీబాయి విష్ణు భక్తురాలని స్థలపురాణం kudali చెబుతుంది. అందుకే ఈ ఆలయాన్ని దర్శించి, అభివృద్ధికి సహకరించారని స్థానికుల విశ్వాసం.
